أحدث الوظائف

(ذهني اتخطف) .. شعر

(ذهني اتخطف)

معرفش ليه ذهني اتخطف

وسألت كل العطّارين 

والبقّالين

والسمكري والبنا 

وبتوع النجف

هاتولي ذهني اتخطف

بقي بعد خطف الطيارات

والعبّارات

بقوا يخطفوا حتي الذهون ؟؟

لأ . . . زودوها بجد 

أصحاب الدقون

طب اروح اجيب ذهنين سلف؟

علشان أردّ علي الفلول

اللي اتمحت منها العقول

ومن الفساد صابها التلف

جاتكوا القرف

ما انتو خطفتوا الدمّ 

من قلب الوريد

وخطفتوا نور البسمه

من وشّ الوليد

وخطفتوا فرحة أمّ 

برجوع ابنها

طالع يدافع عن كرامته ومبدأه

رافع جبينه في السما

والصوت هتف

قالها بشجاعه و في العلن

يسقط زمان الذلّ 

والعار والعفن

يسقط عبيد العسكري

والبلطجي والمفتري

كل اللّي باعوا وفوّضوا

كل اللّي خانوا وأيّدوا

كل اللّي قبضوا 

من شقانا وعمرنا

أرخص تمن

كل اللّي من خير البلد 

عبّا رصيده واغترف

كل اللّي إعلامه انحرف

بالكدب والزور شوّهوا

أهل الطهاره والشرف

علشان حقير عامل بطل

خاين عميل

باع الوطن

علشان يربّي كتافه 

من قوت الشعوب

ويربّي كرشه

من دمانا وأرضنا

ويغذّي عقله بالخرف

ماهو سيسي يابا 

هياكل ايه؟

غير حمل برسيم 

أو علف؟

يا ناس ياهوه

بعتوا البلد ليه لليهود؟

من آل دبي

وأل سعود

واللّي اعترض

حطّيتوا في أيديه القيود

واللّي انتفض

مات في السجود

واللّي اتقتل عند الحرس

واللّي اتحبس

والّي اتخرس

أصبح شريف

أما اللّي بالحق اعتصم

قولتوا عليه 

ذهنه اتخطف

** ** ** **

د/ أحمد عبدالوهاب

عن احمد العبد

اضف رد

إلى الأعلى
shared on wplocker.com